छत्रपती संभाजीनगर – जागतिक किडनी दिनाचे औचित्य साधून किडनी प्रत्यारोपणानंतर यशस्वी व सक्षम जीवन जगणाऱ्या रुग्णांच्या गौरवासाठी विशेष ‘सन्मान’ पुरस्कार सोहळ्याचे आयोजन करण्यात आले आहे. समाजामध्ये अवयव प्रत्यारोपणाबाबत सकारात्मक दृष्टीकोन निर्माण करणे आणि प्रत्यारोपणानंतरही आयुष्य पूर्ण क्षमतेने जगता येते हा संदेश व्यापक पातळीवर पोहोचवणे हा या उपक्रमाचा प्रमुख उद्देश आहे.
हा सोहळा दि. १ मार्च २०२६ रोजी रुक्मिणी ऑडिटोरियम, एमजीएम कॅम्पस, छत्रपती संभाजीनगर येथे होणार आहे. या उपक्रमाचे आयोजन मेडिकवर हॉस्पिटल, छत्रपती संभाजीनगर आणि झेडटीसीसी यांच्या संयुक्त विद्यमाने करण्यात आले आहे.
या कार्यक्रमात किडनी प्रत्यारोपणानंतर स्वावलंबी, सक्रिय आणि प्रेरणादायी जीवन जगणाऱ्या व्यक्तींना सन्मानित करण्यात येणार आहे. वैद्यकीय उपचारानंतर समाजात आत्मविश्वासाने पुनर्स्थापित झालेल्या व्यक्तींच्या यशकथांमुळे इतर रुग्णांना मानसिक बळ मिळावे, तसेच अवयवदान आणि प्रत्यारोपण प्रक्रियेबाबत जनजागृती व्हावी, या दृष्टीने हा उपक्रम महत्त्वाचा मानला जात आहे.
पात्रतेसाठी काही निकष निश्चित करण्यात आले आहेत. संबंधित व्यक्तींच्या किडनी प्रत्यारोपणास किमान सहा महिने पूर्ण झालेले असावेत. प्रत्यारोपण प्रक्रिया मराठवाडा विभागात झालेली असावी. तसेच संबंधित व्यक्ती सध्या स्वावलंबी आणि सक्रिय जीवन जगत असावी. नोकरी, व्यवसाय, शेती, समाजकार्य, व्यापार, राजकारण, शिक्षण किंवा गृहिणी म्हणून कुटुंबीय जबाबदाऱ्या सक्षमपणे पार पाडणाऱ्या व्यक्तींनाही अर्ज करता येणार आहे.
इच्छुकांनी ऑनलाइन नोंदणी करणे आवश्यक असून अर्ज करण्याची अंतिम तारीख दि. ५ फेब्रुवारी २०२६ आहे. आयोजकांनी पात्र लाभार्थ्यांनी वेळेत नोंदणी करून या प्रेरणादायी सन्मान सोहळ्याचा भाग व्हावे, असे आवाहन केले आहे. हा उपक्रम किडनी प्रत्यारोपणानंतरच्या जीवनमानाविषयी समाजात सकारात्मक संदेश देणारा ठरणार आहे.याप्रसंगी डॉ. सचिन सोनी , किडनी विकार तज्ञ, डॉ. राहुल रुईकर, किडनी विकार तज्ञ, मेडिकवर हॉस्पिटलचे सेंटर हेड डॉ विशाल कुटे उपस्थित होते.
