छत्रपती संभाजीनगर, दि.९: व्हॉलीबॉल व ऍथलेटिक्समध्ये राष्ट्रीय खेळाडू म्हणून ओळखल्या गेलेले क्रीडाशिक्षक डॉ. सुहास ज्ञानेश्वर यादव – लोणीकर ( वय ४९ ) यांचे हृदयविकाराच्या धक्क्याने निधन झाल्याची घटना सोमवारी (दि.नऊ) मध्यरात्री दीड वाजता घडली. कन्नड येथील संत तुकाराम महाविद्यालयात क्रीडा संचालक म्हणून ते कार्यरत होते.
येथील गजानन मंदिर भागातील संदेश नगर भागातील फोर स्क्वेअर सोसायटीमधील ते रहिवाशी होते. त्यांच्यावर सोमवारी सायंकाळी लोणी( ता. परतूर) या मूळगावी अंत्यसंस्कार करण्यात आले. यावेळी माजीमंत्री आ बबनराव लोणीकर, माजी आ. प्रा. किशोर पाटील, विजयअण्णा बोराडे, प्राचार्य भागवत कटारे, विद्यापीठाचे क्रीडा संचालक डॉ. सचिन देशमुख यांच्यासह क्रीडा व शिक्षण क्षेत्रातील लोक मोठ्या संख्येने उपस्थित होते. नांदेडच्या स्वारातीम विद्यापीठात नुकत्याच झालेल्या राज्य क्रीडा महोत्सवात डॉ बाबासाहेब आंबेडकर मराठवाडा विद्यापीठाच्या ऍथलेटिक संघाचे प्रशिक्षक व व्यवस्थापक म्हणून त्यांनी सहभाग नोंदवला होता.
परभणीचे दिवंगत माजी खासदार रामराव लोणीकर यांचे ते नातू होत. त्यांच्या पश्चात आई, वडील, दोन भाऊ, पत्नी, मुलगा, मुलगी असा परिवार आहे.
