ढोल-ताशांच्या गजरात सोयगावात शिवजयंती उत्साहात..

सोयगाव, दि. १९ (प्रतिनिधी) – सोयगाव शहरात छत्रपती शिवाजी महाराज जयंती मोठ्या उत्साहात आणि भक्तिभावात साजरी करण्यात आली. ढोल-ताशांचा गजर, लिझीमच्या तालावर रंगलेला नृत्याविष्कार आणि जयघोषांनी शहर दणाणून गेले होते. सकाळी नऊ ते दुपारी एक वाजेपर्यंत भव्य मिरवणूक काढण्यात आली.
यावेळी कुमारी पुष्पा शालिक नागपुरे यांनी छत्रपती शिवाजी महाराजांची वेशभूषा साकारत आकर्षण ठरल्या, तर माँ जिजाऊ मातेच्या भूमिकेत कुमारी मानसी भगवान पंडित यांनी प्रभावी सादरीकरण केले. दोघींची वाजतगाजत मिरवणूक काढण्यात आली.
मिरवणुकीची सुरुवात केंद्रीय प्राथमिक कन्या शाळा येथून झाली. बसस्थानक, छत्रपती शिवाजी महाराज चौक, महर्षी वाल्मिकी ऋषी चौक, डॉ. बाबासाहेब आंबेडकर चौक मार्गे तुळजाभवानी माता मंदिर येथे मिरवणुकीची सांगता झाली. संपूर्ण मिरवणूक शांततेत आणि उत्साहपूर्ण वातावरणात पार पडली.
या कार्यक्रमाला गावकरी, पदाधिकारी, पुढारी,शिक्षक वर्ग व विविध क्षेत्रांतील मान्यवर मोठ्या संख्येने उपस्थित होते. शिवजयंतीनिमित्त शहरात उत्सवी वातावरण निर्माण झाले होते.