‘महात्मा ज्योतिबा फुले संशोधन व प्रशिक्षण संस्थेतर्फे (महाज्योती) २०२४-२५ या वर्षातील स्पर्धा परीक्षा प्रशिक्षणासाठी अर्ज मागविण्याची प्रक्रिया सुरू करण्यात आली आहे. विद्यार्थ्यांना www.mahajyoti.org.in या संकेतस्थळावर ऑनलाइन पद्धतीने तीन जूलैपर्यंत अर्ज सादर करता येणार आहेत,’ अशी माहिती महाज्योतीचे व्यवस्थापकीय संचालक राजेश खवले यांनी दिली आहे.
महाज्योतीमार्फत केंद्रीय नागरी सेवा परीक्षा, राज्यसेवा परीक्षा, अभियांत्रिकी सेवा परीक्षा, स्टाफ सिलेक्शन कमिशन परीक्षा, बँकिंग, एलआयसी व रेल्वे परीक्षा आदी परीक्षांसाठी नामांकित प्रशिक्षण संस्थेत मोफत पूर्व प्रशिक्षण दिले जाते. प्रशिक्षणाबाबतचे सर्व तपशील, निकष, अटी व शर्ती; तसेच अर्ज करण्याची सविस्तर प्रक्रिया याबाबतची माहिती www.mahajyoti.org.in या संकेतस्थळावर प्रसिद्ध करण्यात आली आहे.
या प्रशिक्षणात सहभागी होणाऱ्या विद्यार्थ्यांना महाज्योतीकडून प्रत्येक महिन्यात विद्यावेतन आणि प्रशिक्षणासाठी रुजू होताना एकरकमी आकस्मिक निधीदेखील देण्यात येणार आहे. प्रशिक्षणासाठी विद्यार्थ्यांची निवड प्रवेश परीक्षेद्वारे होणार आहे. या परीक्षेचाही तपशील महाज्योतीच्या वेबसाइटवर उपलब्ध करण्यात आला आहे. या प्रशिक्षण उपक्रमासाठी राज्यातील इतर मागास वर्ग, विमुक्त जाती-भटक्या जमाती व विशेष मागास प्रवर्गातील इच्छुक विद्यार्थ्यांनी विहित कालावधीत अर्ज करावा; तसेच अधिक माहितीसाठी ०७१२-२८७०१२०/१२१ या दूरध्वनी क्रमांकावर संपर्क करावा, असे आवाहन महाज्योतीचे प्रकल्प व्यवस्थापक विकास गडपायले यांनी केले आहे.
