नांदेड : विद्यार्थ्यांमध्ये उद्योजकता, नवकल्पना व आर्थिक साक्षरता विकसित करण्याच्या उद्देशाने गोदावरी कॉलेज ऑफ कॉमर्स, सायन्स अँड टेक्नॉलॉजी, नांदेड यांच्या वतीने GENIAC गोदावरी एंटरप्रेनर्स इन्क्युबेशन अॅण्ड अॅक्सेलरेटर कौन्सिल अंतर्गत ‘GEN-NEX (Finance, Commerce, Inventions)’ हा प्रेरणादायी कार्यक्रम सोमवारी “सहकारसूर्य” मुख्यालय, गोदावरी अर्बन, तरोडा नाका येथे उत्साहात संपन्न झाला. यावेळी कार्यक्रमाला प्रमुख उपस्थिती म्हणून नामदार हेमंत पाटील यांनी मार्गदर्शन केले. मराठवाडा अर्थकारणात मागे असून विद्यार्थ्यांना जागतिक पातळीवरील वित्तीय संधी, आर्थिक व्यवहारांची माहिती मिळावी, या हेतूने अशा उपक्रमांची नितांत गरज असून विद्यार्थ्यांनी या ज्ञानाचा भविष्यात निश्चित उपयोग करावा, असे आवाहन त्यांनी केले.
गोदावरी कॉलेज ऑफ बँकिंगच्या संस्थापक राजश्री पाटील यांनी नोकरी मागणारे हात नव्हे, तर नोकरी देणारे हात घडवायचे आहेत. विद्यार्थ्यांमध्ये उद्योजक वृत्ती विकसित झाली पाहिजे, असे स्पष्ट मत व्यक्त केले. कमी वयातच NSE, BSE, NSDL आणि RBI यांसारख्या नामवंत वित्तीय संस्थांना भेट देण्याची संधी विद्यार्थ्यांना या महाविद्यालयामुळे मिळाल्याचेही त्यांनी नमूद केले. प्रतिष्ठित व्यापारी राजेंद्र हुरणे यांनी ग्राहकांना गुणवत्ता, नाविन्य, उत्तम सेवा व योग्य दर दिल्यास यश हमखास मिळते. पुढील पिढीने नोकरीऐवजी व्यवसायाकडे वळावे, प्रगतीला मर्यादा नाही, असे सांगितले.
शेतकरी नेते गुणवंत पाटील हंगरगेकर यांनी अनुभव हाच खरा गुरु आहे. गुणवत्ता वाढवली तर प्रगती आपोआप होते. आपल्या भागातील गरज ओळखून व्यवसाय केल्यास यशस्वी उद्योजक होता येते, असे मार्गदर्शन केले. कार्यक्रमात विद्यार्थ्यांनी एकूण १० नाविन्यपूर्ण व्यवसाय मॉडेल्स सादर केले. यामध्ये प्युअरपाथ वेलनेस, ब्रू क्रू स्मार्ट कॅफे, गोदावरी फार्मिंग (व्हर्टिकल फार्मिंग), मेल्ट इन मिल्क डेअरी, झिरोकोल बायोफ्युएल प्लांट, रॉयल 3D कस्टमाइझ्ड मेमरीज, वॉटरवेज, ग्रीन हायड्रोजन प्रोजेक्ट, ग्रीन इंडिया ट्रॅव्हल, शॉपईज ई-कॉमर्स या प्रकल्पांचा समावेश होता. मान्यवर परीक्षकांनी उत्कृष्ट सादरीकरणाच्या आधारे ग्रीन हायड्रोजन प्रोजेक्टला प्रथम, ग्रीन इंडिया ट्रॅव्हलला द्वितीय, तृतीय क्रमांक विभागून व्हर्टिकल फार्मिंगला आणि प्युअरपाथ वेलनेसला जाहीर केला.
या कार्यक्रमास नामदार हेमंत पाटील, राजश्री पाटील, गुणवंत पाटील हंगरगेकर, राजेंद्र हुरणे, गोदावरी अर्बनचे सचिव अॅड.रविंद्र रगटे, सीडस अँड पेस्टिसाईडस जिल्हा संघटनेचे अध्यक्ष सदाशिव पुंड, जिन्याकचे मुख्य कार्यकारी अधिकारी मयूर कोकाटे, गोदावरी कॉलेज ऑफ बँकिंगचे प्रा.नेहा कुर्तडीकर, प्रा.उदयपालसिंह लिखारी, प्रा.प्रताप पाटील, प्रशासकीय अधिकारी वैष्णवी प्रसाद पाटील यांच्यासह मान्यवरांची उपस्थिती होती. विद्यार्थ्यांची शंभर टक्के उपस्थिती लाभलेला हा कार्यक्रम विद्यार्थ्यांसाठी उद्योजकतेची नवी दिशा देणारा ठरला.
