जातीपातीचे राजकारण करू नका ही महाराष्ट्राची संस्कृती नाही

सिल्लोड ( प्रतिनिधी ) दि.5, जातीपातीचे राजकारण करू नका ही महाराष्ट्राची संस्कृती नाही असं स्पष्ट करीत जातीपातीचे राजकारण करून कोणी तेढ निर्माण करून राजकीय पोळी भाजत असेल तर त्यांना त्यांची जागा दाखवा व विकासासाठी एकजुट दाखवून शिवसेना उमेदवारांच्या पाठीशी खंबीरपणे उभे रहा , आपल्या भागाचा सर्वांगीण विकास साधण्यासाठी शिवसेना उमेदवारांना प्रचंड मताधिक्याने विजयी करा असे आवाहन उद्योग मंत्री ना.उदयजी सामंत यांनी केले.
जिल्हा परिषद, पंचायत समिती निवडणुकीच्या पार्श्वभूमीवर भराडी ता. सिल्लोड येथे आयोजित शिवसेना उमेदवारांच्या प्रचारार्थ प्रचार सभेला मार्गदर्शन करतांना मंत्री सामंत बोलत . या प्रसंगी शिवसेना आमदार अर्जुनराव खोतकर , आमदार अब्दुल सत्तार यांची प्रमुख उपस्थिती होती.
पुढे बोलत असताना मंत्री सामंत म्हणाले की आमदार अब्दुल सत्तार यांचा विकास कामे करण्याचा हातखंडा कोणी धरू शकत नाही. कुणी उभी आणि आडवी टोपीचे राजकारण करत असेल तर त्यांना धडा शिकवण्याची ही योग्य वेळ असण्याचे त्यांनी नमूद केले.
——————–
राज्याचे उपमुख्यमंत्री एकनाथराव शिंदे यांनी राज्यात सर्व समावेशक विकास कामे केली. माझी लाडकी बहीण योजना जोपर्यंत सूर्य चंद्र आहे तोपर्यंत कधी बंद होणार नाही याचे देखील त्यांनी स्पष्टीकरण दिले.
——–
मंत्री उदय सामंत यांनी आपल्या भाषणामध्ये स्व. अजित पवार यांचे स्मरण केले . तसेच स्वर्गीय बाळासाहेब ठाकरे यांचा छत्रपती संभाजीनगर हा आवडीचा जिल्हा होता. छत्रपती संभाजीनगर जिल्हा परिषदेवर व जिल्ह्यातील पंचायत समितींवर शिवसेनेचा भगवा फडकवा असे आव्हान देखील त्यांनी याप्रसंगी केले.
———–
सिल्लोड येथील मंजूर एमआयडीसी बाबत त्यांनी भूमिका स्पष्ट केली. आमदार अब्दुल सत्तार यांच्या पुढाकार व मागणीनुसार गेवराई सेमी व अंधारी येथे सिल्लोड एमआयडीसी स्थलांतरित करू असा शब्द देखील त्यांनी याप्रसंगी दिला.
——–
याप्रसंगी माजी मंत्री आमदार अब्दुल सत्तार तसेच माजी मंत्री आमदार अर्जुनराव खोतकर यांनी देखील मार्गदर्शन करून उपस्थितांना शिवसेनेच्या उमेदवारांना विजयी करण्याचे आवाहन केले.
———-
व्यासपीठावर माजी जिल्हा परिषद अध्यक्ष श्रीराम पा. महाजन, शिवसेनेचे जिल्हाप्रमुख राजेंद्र जंजाळ , जिल्हा संघटक सुदर्शन अग्रवाल , तालुकाप्रमुख केशवराव तायडे, यांच्यासह स्थानिक पदाधिकारी कार्यकर्ते आजी-माजी लोकप्रतिनिधी ,कार्यकर्ते व मतदार बांधवांची मोठ्या संख्येने उपस्थिती होती.