छत्रपती संभाजीनगर, दि.७ : महात्मा गांधी मिशन विद्यापीठाच्या स्कूल ऑफ इंजिनिअरिंग अँड टेक्नॉलॉजीच्या वतीने महिला सक्षमीकरणाच्या दिशेने एक महत्त्वपूर्ण आणि दूरगामी पाऊल टाकत स्वाती (स्किल्स फॉर विमेन अ‍ॅडव्हान्समेंट अँड ट्रेनिंग इनिशिएटिव्ह) उपक्रमासंदर्भात उच्चस्तरीय धोरणात्मक बैठकीचे आयोजन एमजीएम विश्वस्त कार्यालय येथे मान्यवरांच्या प्रमुख उपस्थितीत करण्यात आले होते.
यावेळी, ग्रीव्ह्ज कॉटन लिमिटेडचे अध्यक्ष करण थापर, एमजीएम विद्यापीठाचे कुलपती अंकुशराव कदम, कुलगुरू प्रा.डॉ. विलास सपकाळ, कुलसचिव डॉ.आशिष गाडेकर, अधिष्ठाता डॉ.हरिरंग शिंदे, संचालिका डॉ.परमिंदर कौर, ग्रीव्ह्ज कॉटनच्या शेफाली सुरी, अर्पित आस्थाना, प्राध्यापक व सर्व संबंधित मान्यवर उपस्थित होते.
महिलांना उद्योग सुसंगत व्यावसायिक शिक्षण, रोजगारक्षम कौशल्ये तसेच उद्योजकतेच्या संधी उपलब्ध करून देण्यासाठी शिक्षणातील दर्जा, कॉर्पोरेट नेतृत्व आणि सामाजिक उत्तरदायित्व यांचा समन्वय साधण्यावर चर्चेदरम्यान विशेष भर देण्यात आला.
या संवादात एमजीएम विद्यापीठाच्या स्कूल ऑफ इंजिनिअरिंग अँड टेक्नॉलॉजीच्या माध्यमातून अभ्यासक्रम निर्मिती, अनुभवाधारित शिक्षण, मार्गदर्शन आणि रोजगाराभिमुख संधी निर्माण करण्याच्या सहकार्यावर सविस्तर चर्चा करण्यात आली. विशेषतः दुर्लक्षित व वंचित घटकांतील महिलांना भविष्यासाठी सज्ज कौशल्ये, आत्मविश्वास आणि आर्थिक स्वावलंबन प्राप्त करून देण्याच्या दृष्टीने ‘स्वाती’ उपक्रमाचे धोरणात्मक महत्त्व अधोरेखित करण्यात आले.
या चर्चेच्या माध्यमातून सर्वसमावेशक विकास, महिलाकेंद्रित कौशल्यविकास आणि उद्योगसंलग्न शिक्षणाबाबतची ठाम बांधिलकी अधिक दृढ झाली असून ग्रीव्ह्ज कॉटन लिमिटेडच्या अर्थपूर्ण सीएसआर उपक्रमांद्वारे समाजात सकारात्मक बदल घडविण्याची संकल्पना अधिक दृढ झाली.