दिव्यांग मॅरेथॉनमध्ये एमजीएमच्या ३०० स्वयंसेवकांचा सहभाग

छत्रपती संभाजीनगर, दि. ९ : नवजीवन सोसायटी फॉर रिसर्च अँड रिहॅबिलिटेशन ऑफ मेंटली हँडिकॅप्ड या संस्थेच्या वतीने स्वमग्न (ऑटिझम) मुलांसाठी ‘दिव्यांग शक्ती रन २०२६’ या मॅरेथॉनचे आयोजन सरस्वती भुवन महाविद्यालयाच्या मैदानावर करण्यात आले होते. या मॅरेथॉनमध्ये एमजीएम विद्यापीठ आणि एमजीएम स्कूल्समधील सुमारे ३०० विद्यार्थ्यांनी स्वयंसेवक म्हणून आपला सहभाग नोंदवला.
या मॅरेथॉनला एमजीएम विद्यापीठाचे कुलसचिव डॉ. आशिष गाडेकर, राष्ट्रीय सेवा योजना समन्वयक डॉ. आर. आर. देशमुख, एमजीएम विद्यापीठ व एमजीएम स्कूल्समधील विद्यार्थी, एनएसएस स्वयंसेवक, एनसीसी कॅडेट्स तसेच सर्व संबंधित मान्यवर उपस्थित होते.
गेल्या पाच वर्षांपासून सातत्याने आयोजित केल्या जाणाऱ्या या उपक्रमात यंदा दिव्यांग बांधवांसह नागरिकांनी मोठ्या संख्येने सहभाग नोंदवला. दिव्यांगांच्या क्षमतांवर विश्वास ठेवून त्यांना समाजाच्या मुख्य प्रवाहात आणण्याचा सकारात्मक संदेश या मॅरेथॉनच्या माध्यमातून देण्यात आला.
कै.जवाहरलाल गांधी, कै. श्रीमती नलिनी शाह यांच्या प्रेरणेतून सुरू झालेली आणि अध्यक्षा सौ. शर्मिला गांधी यांच्या नेतृत्वाखाली कार्यरत असलेली नवजीवन शाळा दिव्यांग मुलांच्या सर्वांगीण विकासासाठी आदर्श ठरत आहे. स्वमग्न मुलांचे जीवन केवळ सुखकरच नव्हे तर त्यांच्या सुप्त गुणांना व कर्तृत्वाला समाजासमोर आणण्याचे कार्य ही संस्था सातत्याने करत आहे. राष्ट्रीय सेवा योजनेच्या माध्यमातून गेल्या अनेक वर्षांपासून एमजीएमचे विद्यार्थी नवजीवन शाळेशी सक्रियपणे जोडले गेले आहेत.
या स्पर्धेत अंध, अपंग, वृद्ध अशा विविध प्रवर्गांतील दिव्यांग स्पर्धक मोठ्या उत्साहाने सहभागी झाले होते. प्रत्येक स्पर्धकासोबत एक स्वयंसेवक चालत अथवा धावत होता. आपले अपंगत्व, वेदना आणि मर्यादा विसरून स्पर्धकांनी केवळ आनंदासाठी आणि जगण्याचा उत्सव साजरा करण्यासाठी मॅरेथॉन पूर्ण केली.
सुमारे दोन तास चाललेल्या या मॅरेथॉनने विद्यार्थ्यांना केवळ शारीरिक नव्हे तर मानसिक आणि भावनिक पातळीवरही अंतर्मुख केले. छोट्या-छोट्या कारणांसाठी तक्रार करणारी, सतत तुलना करणारी आणि संवाद हरवत चाललेली तरुण पिढी या दिव्यांगांच्या सकारात्मकतेपुढे स्तब्ध झाली.
दिव्यांगांच्या जिद्दीला सलाम करत एमजीएमच्या विद्यार्थ्यांना स्वयंसेवक म्हणून काम करण्याची संधी दिल्याबद्दल नवजीवन शाळा, सौ. शर्मिला गांधी, जोशी सर आणि सर्व सहकाऱ्यांचे एमजीएम परिवारातर्फे आभार मानण्यात आले.