डॉ.अरुण मरवाळे यांची आयपीएस अखिल भारतीय सचिवपदी निवड

छत्रपती संभाजीनगर, दि. ११ : इंडियन सायकियाट्रिक सोसायटी (आयपीएस) आणि इंडियन असोसिएशन ऑफ प्रायव्हेट सायकियाट्रिक (आयएपीपी) यांच्या निवडणुकांचे निकाल जाहीर झाले असून ज्येष्ठ मनोविकारतज्ज्ञ डॉ.अरुण मरवाळे यांची दोन्ही संघटनांच्या अखिल भारतीय मानद सचिवपदी निवड झाली आहे.
इंडियन सायकियाट्रिक सोसायटी ही भारतातील मनोविकारतज्ज्ञांची सर्वात मोठी राष्ट्रीय संघटना मानली जाते तर इंडियन असोसिएशन ऑफ प्रायव्हेट सायकियाट्रिक ही खाजगी क्षेत्रात कार्यरत मनोविकारतज्ज्ञ डॉक्टरांची प्रमुख संघटना आहे. विशेष बाब म्हणजे, या दोन्ही राष्ट्रीय स्तरावरील मानाच्या पदांवर निवड होणारे डॉ.अरुण मरवाळे हे मराठवाडा विभागातील पहिले डॉक्टर ठरले असून ही संधी छत्रपती संभाजीनगरला प्रथमच प्राप्त झाली आहे.
या निवडीसाठी डॉ. अरुण मरवाळे यांना इंडियन सायकियाट्रिक सोसायटी छत्रपती संभाजीनगर शाखेच्या सर्व सदस्यांचे भक्कम पाठबळ लाभले. विशेषतः डॉ.विनय बाराळे, डॉ.अजीज कादरी, डॉ. संजीव सावजी, डॉ.रविंद्र डावरे तसेच स्थानिक शाखेचे अध्यक्ष डॉ.माणिक भिसे व इतर सर्व सदस्यांचे सहकार्य मोलाचे ठरले आहे.
सदर पदभार पुढील दोन वर्षांसाठी राहणार असून या कालावधीत रुग्ण व डॉक्टरांच्या हितासाठी विविध कल्याणकारी योजना राबविण्याचा मानस डॉ.मरवाळे यांनी व्यक्त केला आहे. तसेच मेंटल हेल्थ केअर अॅक्ट २०१७ च्या चौकटीत राहून शासन, रुग्ण आणि वैद्यकीय व्यावसायिक यांच्यात समन्वय साधण्यासाठी प्रयत्न केले जातील, अशी माहिती त्यांनी दिली.
डॉ. अरुण मरवाळे यांच्याविषयी माहिती :
डॉ. अरुण मरवाळे हे मनोविकास व मनोविकार तज्ज्ञ म्हणून गेल्या अनेक दशकांपासून आरोग्यसेवेत कार्यरत आहेत. एम.बी.बी.एस., डी.पी.एम., डी.एन.बी. तसेच एम.ए. सायकॉलॉजी अशी भक्कम शैक्षणिक पार्श्वभूमी असलेल्या डॉ.मरवाळे यांनी मानसिक आरोग्याच्या क्षेत्रात उल्लेखनीय योगदान दिले आहे. त्यांनी सुमारे २२ वर्षे शासकीय सेवेत कार्यरत राहून घाटी रुग्णालय, छत्रपती संभाजीनगर, लातूर, पुणे आदी ठिकाणी मानसिक आरोग्य सेवा पुरवली. याचबरोबर, गेल्या १९ वर्षांपासून एमजीएम रुग्णालयात सहाय्यक प्राध्यापक, प्राध्यापक आणि विभागप्रमुख या विविध जबाबदाऱ्या समर्थपणे पार पाडत ते कार्यरत आहेत. किल्लारी भूकंपानंतरच्या पुनर्वसन कार्यात त्यांनी सक्रिय सहभाग घेतला. भूकंपग्रस्त भागातील नागरिकांचे समुपदेशन, उपचार तसेच मानसिक आरोग्य शिबिरे आयोजित करून प्रत्यक्ष क्षेत्रात कार्य करत अनेक कुटुंबांना मानसिक आधार देण्याचे महत्त्वपूर्ण कार्य त्यांनी केले आहे.