बालपणाच्या आठवणींना उजाळा; १९९७–९८ बॅचचा स्नेहमेळावा उत्साहात

गंगापूर | प्रतिनिधी :- काळ पुढे सरकला, जबाबदाऱ्या वाढल्या; मात्र शाळेच्या अंगणात उमटलेल्या पावलांच्या आठवणी आजही तितक्याच जिवंत आहेत. न्यू हायस्कूल, ढोरेगाव येथील इयत्ता दहावी (१९९७–९८) बॅचचा स्नेहमेळावा रविवारी (दि. ८ फेब्रुवारी) उत्साहात पार पडला. हा कार्यक्रम केवळ औपचारिक भेट न राहता सर्वांना पुन्हा एकदा बालपणाच्या आठवणींत घेऊन जाणारा भावनांचा अविस्मरणीय प्रवास ठरला.
तब्बल अठ्ठावीस वर्षांनंतर एकमेकांना भेटताच जणू काळच थांबला होता. जुन्या वर्गखोल्या, शाळेची घंटा, मित्रांचे हसरे चेहरे आणि शिक्षकांचा ओळखीचा आवाज — सगळे काही पुन्हा एकदा जिवंत झाल्याची अनुभूती सर्वांनी घेतली. हास्याच्या आड दडलेल्या हळव्या भावना अनेकांच्या डोळ्यांतून अश्रूंवाटे व्यक्त होत होत्या.
या स्नेहमेळाव्यास जिल्हा परिषद शिक्षक दिलावर शेख यांची प्रमुख उपस्थिती लाभली. आपल्या विद्यार्थ्यांना समाजाच्या विविध क्षेत्रांत यशस्वी होताना पाहण्याचा अभिमान त्यांच्या शब्दांतून स्पष्ट जाणवत होता.
“शाळा ही केवळ शिक्षण देणारी जागा नसून संस्कार घडवणारी पवित्र भूमी आहे. विद्यार्थी घडताना पाहणे हेच शिक्षकांसाठी खरे समाधान,” असे भावूक उद्गार त्यांनी काढले.
या कार्यक्रमास श्री. उत्तमराव बावस्कर व श्री. जयंत जागिरदार यांनी सोशल मीडियाच्या माध्यमातून शुभेच्छा संदेश पाठवून सहभाग नोंदवला.
स्नेहमेळावा यशस्वी करण्यासाठी अमिन पटेल, खंडेराव पवार, रघुनाथ पदार, नवनाथ साखरे, साहेबराव गायकवाड, सुलोचना सुरासे, हीरा पवार आदी माजी विद्यार्थ्यांनी विशेष परिश्रम घेतले.
उपस्थित माजी विद्यार्थी :
अमिन पटेल, खंडेराव पवार, रघुनाथ पदार, नवनाथ साखरे, साहेबराव गायकवाड, निलेश बायस, फारूक शेख, सत्तार पटेल, अमान पटेल, भगवान पठाडे, किशोर चिंधे, नारायण शिंदे, संतोष पवार, दत्तू पवार, नवनाथ शिनगारे, दत्तू धोंडे, अशोक जाधव, अशोक शिंदे, नारायण चिंधे, सुभाष जगधने, पांडुरंग शिंदे, दत्तू उदे, रशीद शेख, संदीप खंडागळे, दीपक पाठे, दत्तू मोरे, राजू शिनगारे, संजय गणराज, विठाबाई मोरे, मीना मुंजाळ, मंगल आभंग, सुलोचना सुरासे, बेबी मोरे, विठाबाई पवार, मीना पठाडे आदी.