छत्रपती संभाजीनगर, दि. १३ फेब्रुवारी २०२६ :- महावितरणकडून राज्यातील घरगुती वीज ग्राहकांसाठी स्मार्ट टीओडी अर्थात टाईम आॅफ डे मीटरच्या माध्यमातून दिवसाच्या वीज वापरामध्ये प्रति युनिट ८० पैसे ते १ रूपया सवलत देण्यात येत आहे. महाराष्ट्र विघुत नियामक आयोगाने पुढील पाच वर्षासाठी निश्चित केलेल्या वीज दरानुसार घरगुती ग्राहकांना टीओडी प्रमाणे वीज दरात सवलत दि. १ जुलै २०२५ पासून सुरू आहे. या अंतर्गत मराठवाडयातील महावितरण प्रादेशिक कार्यालय अंतर्गत छत्रपती संभाजीनगर, लातूर व नांदेड या परिमंडलात १२ लाख १७ हजार २२८ ग्राहकांना सरासरी १ कोटी ९८ लाख १३ हजार रूपयांची सवलत मिळाली आहे. महावितरणकडून हे स्मार्ट टीओडी मिटर ग्राहकांकडे मोफत लावण्यात येत आहे.
नव्या तंत्रज्ञानाच्या मीटरमधून स्वयंचलित मासिक रिडिंग होत असल्याने अचूक बिले मिळतात. घरातील विजेचा वापर दर एक तासाला संबंधित ग्राहकांना मोबाईलवर पाहता येते. त्यामुळे वीज वापरावर देखिल ग्राहकांचे थेट नियंत्रण राहणार आहे. टाईम आॅफ डे प्रणाली नुसार वीज वापराच्या कालावधीनुसार दर आकारणी केली जाते. औधोगिक नंतर घरगुती ग्राहकांना प्रथमच स्वस्त वीज दरासाठी टीओडी प्रमाणे आकारणी सुरू झाली आहे.
सन २०२५ ते २०३० या पाच वर्षासाठी आयोगाने घरगुती ग्राहकांसाठी टाईम आॅफ डे अर्थात टीओडी नुसार सकाळी ९ ते सायंकाळी ५ या वेळेत वापरलेल्या विजेसाठी प्रतियुनिट ८० पैसे ते १ रूपया सवलत मंजूर केली आहे. यात दि. १ जुलै २०२५ ते मार्च २०२६ मध्ये ८० पैसे, सन २०२७ मध्ये ८५ , सन २०२८ व २९ मध्ये ९० पैसे तसेच सन २०३० मध्ये १ रूपये प्रति युनिट सवलत मिळणार आहे. सकाळी ९ ते सायंकाळी ५ वाजे पर्यंत वीज ग्राहक घरातील प्रामुख्याने वाशिंग मशिन, गिजर, इस्त्री, एअर कडिंशनर व जास्त वीज वापर असणा—या इतर उपकरणांचा वापर करू शकतात. त्यात टीओडी मीटरमुळे ग्राहकांचा मोठा अधिक फायदा होणार आहे. या सवलतीचा लाभ घेण्यासाठी टीओडी मिटर घरगुती ग्राहकांकडे बसविणे आवश्यक आहे.
स्मार्ट टीओडी मीटरचे मासिक रिडिंग स्वयंचलित होणार आहे. कोणताही मानवी हस्तक्षेप नसल्याने बिलिंंगच्या तक्रारी जवळपास संपूष्टात येणार आहे. तसेच घरात किती वीज वापरली याची माहिती सर्व संबंधित ग्राहकांच्या मोबाईल अॅपवर उपलब्ध राहणार आहे. त्यामुळे योग्य वीज वापराचे नियोजन करता येईल. यासह ज्यांच्याकडे छतावरील सौर उर्जा प्रकल्प आहे. त्यातून वापरलेल्या व शिल्ल्क राहिलेल्या विजेचा लेखा जोगा ठेवणे हे या स्मार्ट टीओडी मिटरचे प्रमुख फायदे आहेत. या नव्या मीटरचा कोणताही आर्थिक भुर्दंड ग्राहकांवर नाही. स्मार्ट टीओडी मीटर हे प्रीपेड नाही. तर पोस्टपेड आहे. म्हणजे आधी वीज वापरा मग मासिक बिल भरा. अशी सध्याची मासिक बिलिंग पध्दत पुढेही राहणार असल्याचे महावितरणकडू स्पष्ट करण्यात आले आहे.
स्मार्ट टीओडी मिटरमुळे मराठवाडयातील छत्रपती संभाजीनगर, जालना, लातूर, बीड,धाराशिव, नांदेड, परभणी व हिंगोली महावितरण मंडलात देण्यात येणारी सवलत लाख रूपये पुढील प्रमाणे.
मंडल कार्यालय स्मार्ट मीटरचे ग्राहक मिळालेला लाभ
छत्रपती संभाजीनगर शहर १,१२,९०६ ३०.६६
छत्रपती संभाजीनगर ग्रामीण २,१८,११८ २९.५५
जालना १,००,९४७ १४.९०
छत्रपती संभाजीनगर ४,३१,९६४ ७५.१०
परिमंडल
बीड १,१३,१९२ १९.६०
धाराशिव १,४२,०५४ १६.६७
लातूर २,३८,९२२ ३४.२३
लातूर परिमंडल ४,९४,१६८ ७०.५०
नांदेड १,९१,८४५ ३३.५५
हिगोंली ४८,३०८ ०७.३८
परभणी ५०,९४३ ११.६०
नांदेड परिमंडल २,९१,०९६ ५२.५३
मराठवाडा एकूण १२,१७,२२८ १९८.१३
स्मार्ट मीटर म्हणजे अचूकता आणि बचतीचा संगम आहे. बदलत्या तंत्रज्ञानाचा स्वीकार करून ग्राहकांनी हे मीटर बसवण्यासाठी सहकार्य करावे आणि महावितरणच्या आधुनिक सेवांचा लाभ घ्यावा असे आवाहन महावितरण प्रादेशिक कार्यालयाचे सहव्यवस्थापकीय संचालक आदित्य जीवने (भाप्रसे) यांनी केले आहे.
