छत्रपती संभाजीनगर : वीजपुरवठ्यासारख्या अत्यावश्यक क्षेत्रात काम करताना ताणतणाव कमी व्हावा व कर्मचाऱ्यांची कार्यक्षमता वाढावी यासाठी महावितरणच्या छत्रपती संभाजीनगर परिमंडलातील कर्मचाऱ्यांचे ‘आनंदोत्सव-2026’ हे कौटुंबिक स्नेहसंमेलन गुरुवारी (12 फेब्रुवारी) उत्साहात पार पडले. ग्राहकांना अविश्रांत सेवा देणाऱ्या कर्मचाऱ्यांना या सोहळ्यामुळे नवी ऊर्जा मिळाली.
छत्रपती संभाजीनगर परिमंडलाचे मुख्य अभियंता पवनकुमार कछोट यांच्या प्रमुख उपस्थितीत लालवाडी (ता.अंबड) येथील मातोश्री कृषी पर्यटन केंद्रात हा कार्यक्रम झाला. कार्यक्रमाच्या अध्यक्षस्थानी जालना मंडलाचे अधीक्षक अभियंता संजय सरग होते. निसर्गोपचारतज्ञ डॉ.योगिता कछोट, उपमहाव्यवस्थापक कांचन राजवाडे, सहायक महाव्यवस्थापक शिल्पा काबरा, उपमुख्य औद्योगिक संबंध अधिकारी विश्वास पाटील यांची मंचावर उपस्थिती होती.
याप्रसंगी मुख्य अभियंता कछोट म्हणाले की, दैनंदिन कामाबरोबरच विविध क्षेत्रात महावितरणचे कर्मचारी उत्कृष्ट कामगिरी करत आहेत. एकाच महिन्यात सर्वाधिक सौर कृषिपंप बसवण्याच्या महावितरणच्या कामाची गिनीज बुक ऑफ वर्ल्ड रेकॉर्ड्समध्ये नुकतीच नोंद झाली. या विक्रमात सर्व कर्मचाऱ्यांचा मोलाचा वाटा आहे. कर्मचाऱ्यांच्या उत्कृष्ट कामगिरीत त्यांच्या कुटुंबियांचीही महत्त्वाची भूमिका आहे. अनेक वेळा रात्री-अपरात्री खंडित झालेला वीजपुरवठा पूर्ववत करण्यासाठी तांत्रिक कर्मचाऱ्यांना कर्तव्यावर हजर व्हावे लागते. मात्र कसलीही तक्रार न करता कुटुंबीय त्यांना सांभाळून घेतात. त्यांना विरंगुळा मिळावा म्हणून या कौटुंबिक स्नेहसंमेलनाचे आयोजन करण्यात आले आहे.
कार्यक्रमात वैयक्तिक, कौटुंबिक व सामूहिक गटात वेशभूषा स्पर्धा, संगीत खुर्ची स्पर्धा घेण्यात आली. या स्पर्धांतील विजेत्यांसह नुकत्याच झालेल्या क्रीडा स्पर्धांतील विजेत्यांना मान्यवरांच्या हस्ते बक्षिसे देण्यात आली. प्रास्ताविक उपमुख्य औद्योगिक संबंध अधिकारी विश्वास पाटील यांनी केले. सूत्रसंचालन भानुदास शेवाळे यांनी केले. व्यवस्थापक डॉ.शिवाजी तिकांडे यांनी आभार मानले. अधीक्षक अभियंता बीना सावंत, कार्यकारी अभियंता राजेंद्र नाहटा, महेंद्र देशमुख, वेंकटेश पेन्सलवार, सोमनाथ मठपती, वसंत हिवाळे, शैलेश कलंत्री, रमेश वाघचौरे, अविनाश राऊत, प्रेरणा बनकर, प्रणाली विश्लेषक मनीषा निफाडकर, कैलास देशमुख, तौसिफ पटेल, व्यवस्थापक सुरेखा कदम, सुनील मगरे, बापू शिंदे यांची उपस्थिती होती. कार्यक्रमाच्या यशस्वितेसाठी योगेश जाधव, सतीश काळे, गणेश डांगे यांनी पुढाकार घेतला. विविध कामगार संघटनांचे पदाधिकारी, परिमंडलातील कर्मचारी व त्यांच्या कुटुंबियांनी मोठ्या संख्येने उपस्थित राहून या सोहळ्याचा आनंद घेतला.
