सिल्लोड ( प्रतिनिधी ) दि.13, अंभई जिल्हा परिषद सर्कल मधील वडाळा, बोजगाव, रेलगाव, जांभई, जळकी घाट या गावात आमदार अब्दुल सत्तार यांचा आभार दौरा उत्साहपूर्ण वातावरणात पार पडला. नुकत्याच झालेल्या जिल्हा परिषद , पंचायत समिती निवडणुकीत मतदारांनी दिलेल्या भरघोस पाठिंब्यानंतर त्यांनी गावागावांत भेटी देत नागरिकांचे प्रत्यक्ष आभार मानले.
याप्रसंगी जिल्हा बँकेचे चेअरमन अर्जुन पा. गाढे, कृउबा समितीचे संचालक दामूअण्णा गव्हाणे, सतीश ताठे, राजेंद्र ठोंबरे, विशाल जाधव, प्यारेलाल जैस्वाल, अरविंद शिंदे, गजानन चाथे , सरपंच लक्ष्मण जगताप, स्वप्नील शेळके , गौरव सहारे आदींची उपस्थिती होती.
आभार दौऱ्याची सुरुवात अंभई सर्कल मधील वडाळा येथून करण्यात आली. त्यानंतर आमदार अब्दुल सत्तार यांनी विविध वाड्या-वस्त्यांवर जाऊन नागरिकांशी संवाद साधत त्यांच्या विश्वासाबद्दल कृतज्ञता व्यक्त केली. मतदारांनी दाखविलेला विश्वास हा आमच्यासाठी प्रेरणादायी आहे. गावातील सर्वांगीण विकास व जनतेच्या विविध समस्या सोडवण्यासाठी आम्ही कटिबद्ध असल्याचे आमदार अब्दुल सत्तार म्हणाले. त्यांनी पाणीपुरवठा, रस्ते दुरुस्ती, शिक्षण व आरोग्य सुविधांबाबत प्राधान्याने काम केले जाईल, असेही स्पष्ट केले.
