छत्रपती संभाजीनगर, दि.१३ : महात्मा गांधी मिशन विद्यापीठाच्या स्कूल ऑफ बेसिक अँड अप्लाईड सायन्सेस आणि दि इंडियन असोसिएशन ऑफ फिजिक्स टीचर्स (आयएपीटी) आरसी-०८ व सब आरसी-०८ एफ (मराठवाडा विभाग) यांच्या संयुक्त विद्यमाने आयोजित करण्यात आलेल्या ‘आयएपीटी महाराष्ट्र स्टेट कन्व्हेन्शन २०२६’ या राज्यस्तरीय अधिवेशनाचे उद्घाटन आज विद्यापीठाच्या रुक्मिणी सभागृहात मान्यवरांच्या उपस्थितीत उत्साहात संपन्न झाले.
या अधिवेशनाच्या उद्घाटन सोहळ्यास विद्यापीठाचे कुलपती अंकुशराव कदम, कुलगुरू प्रा. डॉ. विलास सपकाळ, कुलसचिव डॉ. आशिष गाडेकर यांच्यासह बार्क-यूजीसी–डीएई केंद्राचे संचालक डॉ.पी.डी.बाबू, आयएपीटी महाराष्ट्र प्रादेशिक परिषदेचे अध्यक्ष प्रा.महेश शेट्टी, डॉ.एम.एस.जोगड, प्रो.जी.के.बिचले, अधिष्ठाता डॉ.प्राप्ती देशमुख, एमेरिटस प्राध्यापक डॉ.के.एम.जाधव, प्राध्यापक, संशोधक, विद्यार्थी व विविध शैक्षणिक संस्थांचे प्रतिनिधी मोठ्या संख्येने उपस्थित होते.
‘रिव्होल्यूशनायझिंग फिजिक्स एज्युकेशन : इंटिग्रेटिंग क्वांटम टेक्नॉलॉजीज अँड आर्टिफिशियल इंटेलिजन्स’ ही या अधिवेशनाची मुख्य संकल्पना असून आधुनिक भौतिकशास्त्र शिक्षणातील बदलते प्रवाह, कृत्रिम बुद्धिमत्ता व क्वांटम तंत्रज्ञानाचा वाढता प्रभाव, संशोधनातील नवे क्षितिज आणि भविष्यातील शैक्षणिक दिशा यावर सखोल मंथन या परिषदेत होणार आहे.
ईसी मेंबर प्रो. डॉ. शिवानंद मस्ती यांनी विद्यार्थ्यांसाठी तरंग, प्रकाश, बल, दाब, चुंबकत्व अशा विविध वैज्ञानिक संकल्पनांवर आधारित प्रयोग सादर केले. त्यांनी सोप्या भाषेत आणि रोचक पद्धतीने प्रयोग दाखवून विद्यार्थ्यांना विज्ञानातील तत्त्वे समजावून सांगण्यात आली.
कार्यक्रमाची सुरुवात मान्यवरांच्या हस्ते द्वीपप्रज्वलनाने झाली. अधिष्ठाता डॉ. प्राप्ती देशमुख यांनी प्रास्ताविक करत अधिवेशनाच्या उद्दिष्टांची माहिती दिली. अधिवेशनाच्या माहिती पुस्तिकेचे यावेळी मान्यवरांच्या हस्ते प्रकाशन करण्यात आले. अधिवेशनात आयएपीटी ‘अन्वेषिका/ज्योत’मराठवाडा विभागात ठेवली असून ती संपूर्ण भारतभरातील विविध संस्थांमध्ये जाणार आहे. कार्यक्रमाचे सूत्रसंचालन आंचल कपूर आणि नंदिनी सिंग यांनी केले तर कार्यक्रमाचे आभार प्रदर्शन डॉ.क्रांती झाकडे यांनी केले.
या अधिवेशनाच्या उद्घाटन सोहळ्यात मान्यवरांनी व्यक्त केलेले विचार खालीलप्रमाणे आहेत :
कुलगुरू प्रा. डॉ. विलास सपकाळ : एमजीएम विद्यापीठात बी.एस्सी., एम.एस्सी., पीएच.डी. तसेच क्वांटम फिजिक्ससारख्या आधुनिक विषयांचे अध्यापन केले जाते. भौतिकशास्त्राच्या माध्यमातून विद्यार्थी ‘युनिक इनोव्हेटर्स’ म्हणून घडत आहेत. या अधिवेशनामुळे विद्यार्थ्यांच्या ज्ञानात भर पडेल आणि संशोधनासाठी नवी दिशा मिळेल, असा विश्वास त्यांनी व्यक्त केला.
प्रा. महेश शेट्टी : कृत्रिम बुद्धिमत्ता आज विविध माध्यमांतून आपल्याला माहिती पुरवत आहे. आपण एआयचा वापर केला किंवा नाही केला तरी एआय आपल्या जीवनाचा भाग बनला आहे. त्यामुळे तरुण संशोधकांनी अशा परिषदांमधून कल्पनांची देवाणघेवाण करून नव्या संकल्पना आत्मसात कराव्यात आणि संशोधन क्षेत्रात नावीन्यपूर्ण वाटा चोखाळाव्यात.
प्रो.जी.के.बिचले : छत्रपती संभाजीनगरमध्ये आयएपीटीची सुरुवात शिक्षण आणि विद्यार्थ्यांमध्ये भौतिकशास्त्राविषयी आवड निर्माण करण्यासाठी झाली. विद्यार्थ्यांनी आपल्या विषयातील ज्ञान अधिक व्यापक करण्यासाठी अशा व्यासपीठांचा लाभ घ्यावा, असे त्यांनी आवाहन केले.
या राज्यस्तरीय अधिवेशनामुळे भौतिकशास्त्र विषयातील शिक्षक, संशोधक आणि विद्यार्थी यांना एकत्र येऊन नव्या तंत्रज्ञानाच्या पार्श्वभूमीवर विचारमंथन करण्याची संधी उपलब्ध झाली आहे. आगामी सत्रांमध्ये विविध तज्ज्ञांची व्याख्याने, संशोधन सादरीकरणे आणि चर्चासत्रे आयोजित करण्यात आली आहेत.
