भुपेंद्र यादवांकडे पुन्हा विधानसभेची जबाबदारी,भाजपाचे मिशन ‘लोटस’

२०२४ च्या महाराष्ट्र विधानसभा निवडणुकीसाठी भाजपने केंद्रीय मंत्री भूपेंद्र यादव यांच्यावर पुन्हा विश्वास ठेवलाय. २०१९ च्या विधानसभा निवडणुकीत भूपेंद्र यादव महाराष्ट्राचे प्रभारी होते आणि त्यांच्या नेतृत्वात भाजपने १०५ जागा जिंकल्या होत्या. यावेळी राज्यातील राजकीय परिस्थिती वेगळी असली तरी पाच वर्षांनंतर त्यांना पुन्हा तीच भूमिका देण्यात आली आहे. सहप्रभारी अश्विनी वैष्णव यांच्यासह यादव कितपत यशस्वी होतात हे पाहणे उत्सुकतेचे ठरणार आहे.
यावेळी भाजपच्या लोकसभेच्या २३ वरून ९ जागा कमी झाल्या आहेत. भाजपच्या मित्रपक्षांची कामगिरी फारशी चांगली नाही. विशेषत: अजित पवार यांच्या नेतृत्वाखालील राष्ट्रवादी काँग्रेसची कामगिरी तितकी बरी दिसलेली नाही. शिंदे यांनी आपली विश्वासार्हता काही प्रमाणात वाचवली आहे. महाविकास आघाडीचा भाजपला सर्वाधिक फटका बसला आहे. राज्यात लोकसभेच्या जागा जिंकण्याच्या बाबतीत काँग्रेस आघाडीवर असून, त्यांना १३ जागा मिळाल्या आहेत. महाविकास आघाडीने एकूण 31 जागा (अपक्ष विशाल पाटील यांच्यासह) जिंकल्या आहेत. त्यात शिवसेनेला (ठाकरे गट) 9 तर शरद पवार यांच्या राष्ट्रवादीला 8 जागा मिळाल्या आहेत.
2019 च्या विजयाचा हिरो ठरलेल्या भूपेंद्र यादव यांच्यासमोर आता भाजपला राज्यात पुन्हा मोठा आकडा मिळवुन देण्याचे आव्हान आहे. केंद्रात पर्यावरण, वन आणि हवामान बदल मंत्रालयाची जबाबदारी सांभाळणाऱ्या भूपेंद्र यादव यांच्यासमोर महाराष्ट्राच्या बदललेल्या राजकीय वातावरणात पुन्हा भाजपच्या बाजूने वारे निर्माण करण्याचे चॅलेंज आहे. यादव यांना पुन्हा महाराष्ट्राचे प्रभारी बनवण्याचे मुख्य कारण म्हणजे त्यांना राज्याच्या राजकारणाची चांगली जाण आहे. राज्यातील नेत्यांपासून केंद्रीय नेतृत्वापर्यंत त्यांचा चांगला समन्वय आहे. यासह मुख्य म्हणजे महाराष्ट्राचे भाजप नेते देवेंद्र फडणवीस यांचे त्यांच्याशी चांगले ट्यूनिंग आहे.
अशा स्थितीत राज्यातील परिस्थिती बदलली असली, तरी सुमारे ४० दिवसांपूर्वी जबाबदारी सोपवून भाजपने महाराष्ट्रात पक्षाचा विजय आणि क्रमांक एकचे स्थान अत्यंत महत्त्वाचे असल्याचे संकेत दिले आहेत. भूपेंद्र यादव जिथे जिथे प्रभारी आहेत तिथे भाजपची कामगिरी चांगली राहिली आहे. अलवरमधून विजयी झालेले भूपेंद्र यादव हेही अनेक दिवसांपासून बिहारमध्ये सक्रिय आहेत. प्रथम त्यांची बिहारमध्ये सहप्रभारी म्हणून नियुक्ती करण्यात आली आणि नंतर प्रभारीपदाची संपूर्ण जबाबदारी देण्यात आली. 2019 मध्ये भूपेंद्र यादव महाराष्ट्राचे प्रभारी झाले तेव्हा भाजपची कमान अमित शहा यांच्याकडे होती. त्यावेळी त्यांच्यासह केशवप्रसाद मौर्य आणि लक्ष्मण सावदी यांची निवडणूक सहप्रभारी म्हणून नियुक्ती करण्यात आली होती.